PREMIOS JUGAMOS POR LA IGUALDAD. NO AL MACHISMO – 2022
La 36 Gala del Deporte Asturiano, que va celebrase’l 1 de payares nel Auditoriu José Barrera de Pravia, va añedir nesta edición dos reconocencies especiales: el troféu a la Superación, pa Pelayo Novo, exfutbolista del Real Uviéu; y el premiu Rey Pelayo pa Enzo Ferrero, exfutbolista del Sporting.
La directora xeneral de Deporte, Beatriz Álvarez Mesa, presentó güei la gala, que vuelve celebrase depués de la so cancelación nel 2020 por causa de la pandemia. Cola elección de Pravia como sede, reconozse’l trabayu de la localidá, escoyida Villa Europea del Deporte
Tres un añu y mediu marcáu pola crisis sanitaria, tiempu mientres el que l’actividá deportiva quedó paralizada cuasi dafechu, l’Asociación de la Prensa Deportiva del Principáu, en consensu cola Dirección Xeneral de Deportes, va entregar los galardones correspondientes al 2019 y el Premiu al Meyor Deportista del 2020.
Álvarez Mesa anunció delles novedaes na gala, que va incluyir dos reconocencies especiales. La primera d’elles, el Troféu a la Superación pa Pelayo Novo, exfutbolista del Real Uviéu y de los clubes Elche, Córdoba, Lugo y Albacete, quien, depués d’un grave accidente, dio muestres de la so voluntá de superar torgues al siguir vinculáu al deporte entrenando y compitiendo nel campeonatu nacional de tenis en siella de ruedes.
El segundu d’ellos, el Troféu Rey Pelayo, va entregase a Enzo Ferrero, futbolista nacíu en Bonos Aires y xugador del Boca Juniors que llegó a Xixón pa defender la camiseta del Sporting en Primera y Segunda División y convirtió Asturies na so casa.
A esta nómina de premiaos hai qu’añedir al pilotu Fernando Alonso, designáu Meyor Deportista del 2019, y al xugador de balonmano Raúl Entrerríos, capitán de la Selección Española, reconocíu Meyor Deportista Asturianu del 2020.
El restu de gallardonaos y nomaos d’esta gala son Aida Nuño (ciclismu), primer accésit; Toni Pérez (h.oquei), segundu accésit; David Villa (fútbol), trayectoria deportiva; Marcelino García Toral (fútbol), meyor técnicu, y Jesús Rodrigo (ciclismu), valores humanos.
Nel apartáu de clubes van recibir distinciones Cosa Nuesa (discapacidá), Club Patín Mieres y Grupo Cuadonga, mentes qu’Automovilismu, Surf y Baloncestu van ser premiaes como federaciones. Aroa Silva (natación), Félix González (pádel) y Iván Cantero (golf) lo van ser nel capítulu de promeses; Adrián Morán, David Naredo y Iván Rivas, nel deporte autóctono; David Fernández, Israel Blanco y Sergio Vaquero, nel deporte adaptáu, y Alonso Meana (baloncestu), Bárbara Camblor (atletismu) y Kasandra Sylla (rugbi), como meyores deportistes universitarios. Los ganadores, d’ente los trés nomaos en cada categoría, van conocese mientres la ceremonia.
La directora xeneral tuvo acompañada na presentación por David Álvarez, alcalde de Pravia, y por Iñigo Domínguez, presidente de l’Asociación de la Prensa Deportiva del Principáu, que promueve y entama la gala xunto al Gobiernu d’Asturies.
Fuente: Gobiernu del Principau d’Asturies
Contenido relacionado
